،، وقال قاسية..وجبارة.. // أحلام المصري ،،

[أحلام المصري]

،، وقال قاسية..وجبارة.. // أحلام المصري ،،
،
،

بتكتب غنوة تهجيني،
بتسب حبي
وسنيني..
والا جاي تفكّرْني
وتنادي
حنيني!

افتح فونك ولابك..
وشوف كام مرة
دق بابك،
سهرت أنادي طيف قاسي
ولا مرة جاني جوابك!

دلوقتي بقيت قاسية!
بعت ايامك وناسية؟
دلوقتي بتقول فاكر..
ومتعذب وأنا ماشية!

طيب ما نحكي من تاني
الحكاية..
بس من اولها
للنهاية
من غير مونتاج وتقطيع..
وشوف مين فينا كان شاري
ومين أستاذ ف البيع!

عموما يا قاسي
بطبعك،
انت ناسي
ودا طبعك
وأنا فعلا
دلوقتي.. بقيت
قاسية وناسية وجبارة
واخدة قراري
مش محتارة...
بحكم في أمر نفسي
وليا امارة...

[أحلام المصري]

قول كمان وسمّعني
كلام قاسي واوجعني
قول كتير ولا يهمّك
هسمع وأقول: وايه يعني؟!

[أحلام المصري]

وقال عني مغرورة
قلت ومالو
مانا لا عيني مكسورة
ولا جوايا عكس الصورة
وقلبي على حالو

تقول عني بقى طفلة،
تقول مجنونة او عاقلة
لكن عمرك ما تقدر تقول:
سهلة!

أنا اكتر حد عارفاني،
عارفة عيوبي وشايفاني
وعارفة نقط ضعفي،
والحاجات اللي مقوياني..

قول عني مغرورة.. طب ومالو!
الغرور حقي وأنا كتيرة عليه!!

[أحلام المصري]

ايوة انا القاسية
انا اللي كتير مغرورة..
عمري ما ابيع نفسي
ولا أكون بيك.. مكسورة!

[قصي المحمود]

متصفح أكثر من رائع

[أحلام المصري]

متصفح أكثر من رائع

شكرا لحضوركم المتميز

[أحلام المصري]

محتاجة أكون قاسية
أحسن ماكون باكية
محتاجة اوي أتعلم فنون البيع
تعبني قلبي الغبي بشكل فظيع
محتاجة اني اكون موسم خريف
اصفر
وقلب ناشف ومتحجر
محتاجة انسى يعني ايه ربيع
وازاي أكون صفصافة
شايفة كل شيء،
ومش متشافة!
بس ساكتة على فعل الزمن
فروعها صفرا بس هفهافة
مالية قلبها الاسرار
بس ساكتة ورغم الجحود..
باقية!